2025 sa fer 190 an depi ki labolision lesklavaz inn proklame dan Moris. Kouma sak lane Leta Morisien pou komemor memwar nou bann gran fami ki finn viktim de form expwlatasion pli barbar ki limanite finn kone.
Sa komemorasion sa lane la pe pran enn dimension istorik ek sinbolik bien for avek rekonesans revolt ki finn ena 330 an de sela dan Vieux Grand-Port. An efe le 18 Zin 1695 Anna van Bengal, Esperance van Bengal, Anthoni van Malabar ek Aron van Ambon ti met dife dan kazern Olande pou reklam la liberte.
Si sa akt la inn res vivan dan memwar kolektif, zame pa finn ena enn rekonesans Leta de sa moman inportan pou listwar nou pei. Depi 2014 Rezistans ek Alternativ avek so bann alie sindikal GWF, JNP (lindistri sirkrie), Syndicats des Pêcheurs ek CARES inn fer zot enn devwar pou onor memwar sa bann kamarad la ek demann rekonet zot akt eroik. An 2024 dan lakor ki finn fer ant Rezistans ek Alternativ ek lezot partner l’Alliance du Changement ena “La reconnaissance officielle de la contribution de Anna de Bengal et de ses camarades dans la marche de la République de Maurice vers son emancipation”.
Sa rekonesans ofisiel Leta Morisien de sa akt eroik de revolt, pe fer dimans le 2 Fevriye dan kad diferan aktivite an lien avek komemorasion labolision lesklavaz par Leta. Aktivite de rekonesans pe fer fer 4h30 lapremidi, dan mize Fort Frederik, Vieux Grand-Port. Pou ena pou sa lokazion la devwalman enn stel ki pou fer dan Mize Fort Frederik Hendrik par bann reprezantan Leta. Sa pou asire ki tou dimounn ki visit sa landrwa la kone ki finn arrive 330 an de sela. Li inportan ki bann Lieu de mémoire ek bann resi istorik donn naratif de bann oprime. Rekonesans Anna van Bengal ek so bann kamarad pou osi fer dan enn moman kot pou ena enn premie piblikasion konsakre a sa personaz la ki finn fer par istorien Joël Edouard.
Rezistans ek Alternativ, asosie li avek Minister Lar ek Kiltir pou invit tou Morisienn ek Morisien pou prezan dimans le 2 Fevriye, 4h30 lapremidi, mize Fort Frederik Hendrik, Vieux Grand-Port, pou viv sa moman istorik la. Revolt 1695 ena plizir leson pou pei Moris. Li finn demontre sirtou ki kan bann dimounn ki oprime vinn ansam ek organize, pe inport zot lorizinn, pe inport bondie zot prie, pe inport langaz zot koze… zot kapav sanz kour listwar.
Stefan Gua & Dany Marie
Pou Rezistans ek Alternativ
![[Vidéo News] Restrictions d’eau renforcées à Maurice face à la sécheresse](https://www.maurice-info.mu/wp-content/uploads/2025/01/Patrick-Assirvaden-inquiet-sur-le-niveau-deau-dans-les-reservoirs.jpg)
